Պուտինի Չինաստան այցի ընթացքում Մոսկվան և Պեկինը նոր համատեղ հռչակագիր կընդունեն

Ռուսաստանն ու Չինաստանը Ռուսաստանի նախագահ Վլադիմիր Պուտինի Պեկին կատարելիք այցի ընթացքում նախատեսում են ընդունել բազմաբևեռ աշխարհի ձևավորման և նոր տիպի միջազգային հարաբերությունների վերաբերյալ համատեղ հռչակագիր։ Այս մասին հայտարարել է Ռուսաստանի նախագահի օգնական Յուրի Ուշակովը, փոխանցում է ՏԱՍՍ գործակալությունը։

Ուշակովի խոսքով՝ Վլադիմիր Պուտինն ու Չինաստանի նախագահ Սի Ցզինպինը կստորագրեն կարևոր հայեցակարգային փաստաթուղթ, որը վերաբերում է բազմաբևեռ աշխարհի ձևավորմանը։ Նա նաև հայտնել է, որ այցի շրջանակում կողմերը կստորագրեն շուրջ 40 տարբեր համագործակցության փաստաթուղթ, որոնցից 21-ը կստորագրվի երկու երկրների առաջնորդների ներկայությամբ։

Վլադիմիր Պուտինի այցը Չինաստան նախատեսված է մայիսի 19-20-ը՝ Սի Ցզինպինի հրավերով։ Ավելի վաղ Կրեմլի ներկայացուցիչ Դմիտրի Պեսկովը հայտարարել էր, որ Մոսկվայում մեծ ակնկալիքներ ունեն Ռուսաստանի նախագահի առաջիկա այցից։