Եվրամիությունում ցանկանում են երկարացնել Ռուսաստանի դեմ պատժամիջոցների գործողության ժամկետը

Եվրամիությունը քննարկում է Ռուսաստանի դեմ սահմանված պատժամիջոցների գործողության ժամկետը վեց ամսից մինչև մեկ տարի երկարացնելու հնարավորությունը։ Այս մասին հայտնում է Politico պարբերականը՝ հղում անելով եվրոպացի դիվանագետների և պաշտոնյաների։

Հրապարակման համաձայն՝ հարցը ակտիվ քննարկման փուլ է մտել այն բանից հետո, երբ Վիկտոր Օրբանը հեռացել է Հունգարիայի վարչապետի պաշտոնից։ Օրբանը նախկինում հաճախ արգելափակում էր հակառուսական սահմանափակումների երկարաձգման որոշումները։ Նշվում է, որ Հյուսիսային Եվրոպայի մի շարք երկրներ արդեն բարձրացրել են այս հարցը՝ մայիսի 26-ին նախատեսված Եվրամիության խորհրդի նիստից առաջ։

Եվրահանձնաժողովը անդամ երկրներին կառաջարկի երկու տարբերակ՝ պահպանել գործող վեցամսյա մեխանիզմը կամ անցնել 12-ամսյա ցիկլի։ Սակայն Politico-ն գրում է, որ նույնիսկ Օրբանի հեռանալուց հետո որոշ երկրների դիրքորոշումը կարող է դժվարացնել որոշման ընդունումը, քանի որ այն պահանջում է բոլոր անդամների միաձայն աջակցությունը։ Միևնույն ժամանակ Եվրամիությունը շարունակում է պատրաստել Ռուսաստանի դեմ 21-րդ պատժամիջոցների փաթեթը, որը կարող է ներկայացվել հունիսի վերջին կամ հուլիսի սկզբին։