«Ոչ մի ռեկորդ չի կարող համեմատվել մարդու կյանք փրկելու հետ»․ սովետական ստորջրյա լողի մարզիկ Շավարշ Կարապետյանի ծննդյան տարեդարձն է

Այսօր սովետական ստորջրյա լողի մարզիկ, ԽՍՀՄ յոթակի չեմպիոնը և ԽՍՀՄ սպորտի վաստակավոր վարպետ լեգենդար Շավարշ Կարապետյանի ծննդյան տարեդարձն է։

Համաշխարհային ճանաչում նրան բերեցին ոչ միայն մարզական ռեկորդները։ 1976 թվականի սեպտեմբերի 16-ին 23-ամյա Շավարշը Երևանի ջրամբարում խորտակվող տրոլեյբուսից դուրս բերեց 46 մարդու։ Վթարի վայրում նա հայտնվել էր պատահաբար՝ առավոտյան վազքի ժամանակ։ Տեսնելով ջրի մեջ ընկած տրոլեյբուսը՝ Կարապետյանը արագ կողմնորոշվեց և նետվեց ուղևորներին օգնության։ Այդ 46 մարդկանցից բժիշկներին հաջողվեց փրկել 20-ի կյանքը։ Այդ օրից Շավարշ Կարապետյանը դարձավ ոչ միայն Հայաստանի, այլև ամբողջ Խորհրդային Միության ազգային հերոսը։

Ստացած ծանր վնասվածքների պատճառով Շավարշը չկարողացավ շարունակել մարզական կարիերան, սակայն դարձավ մարզիչ։

Շավարշ Կարապետյանի հավաքածուում կա ավելի քան 1500 պատվոգիր, դիպլոմ և շնորհակալական նամակ։ Նա ԽՍՀՄ առաջին քաղաքացին էր, ով արժանացավ «Fair Play» («Արդար խաղի համար») շքանշանին, որով ՅՈՒՆԵՍԿՕ-ն պարգևատրում է սպորտում բարձրագույն ազնվություն ցուցաբերած մարզիկներին։

Շավարշ Կարապետյանը Ռուսաստանի ստորջրյա լողի ասոցիացիայի պատվավոր նախագահն է, իսկ նրա անունով անվանակոչվել է №3027 աստերոիդը։

Իսկ ինքը՝ հերոսը, մշտապես կրկնում է․ «Ոչ մի ռեկորդ չի կարող համեմատվել մարդու կյանք փրկելու հետ»։