Reuters․ ԱՄՆ-ն սպառնում է չեղարկել ՄԱԿ-ում պաղեստինցի դիվանագետների վիզաները

Միացյալ Նահանգները սպառնում է չեղարկել ՄԱԿ-ում պաղեստինցի դիվանագետների վիզաները՝ ձգտելով ՄԱԿ-ում Պաղեստինի մշտական ​​դիտորդ Ռիադ Մանսուրին ստիպել հետ վերցնել Գլխավոր ասամբլեայի (ԳԱ) փոխնախագահի պաշտոնի համար իր թեկնածությունը։ Այս մասին հայտնել է Reuters-ը՝ հղում անելով Պետդեպարտամենտի ներքին փաստաթղթերին։

Գործակալության տվյալներով՝ չորեքշաբթի՝ մայիսի 20-ին, Երուսաղեմում ԱՄՆ դեսպանատան աշխատակիցները ստացել են հեռագիր, որում պահանջվում է Պաղեստինին տեղեկացնել, որ Վաշինգտոնը կարծում է, որ Մանսուրի մտադրությունը՝ առաջադրվել ՄԱԿ-ի Գլխավոր ասամբլեայի փոխնախագահի պաշտոնում, «սրել է լարվածությունը» և սպառնում է խափանել ԱՄՆ նախագահ Դոնալդ Թրամփի՝ Գազայի հատվածի համար խաղաղության ծրագիրը:

«Մենք պատասխանատվության կենթարկենք Պաղեստինի ինքնավարությանը, եթե պաղեստինյան պատվիրակությունը հետ չկանչի Գլխավոր ասամբլեայի փոխնախագահի պաշտոնի իր թեկնածուին», - մեջբերում է գործակալությունը հեռագիրը: ԱՄՆ-ն նաև առաջարկել է չեղարկել ՄԱԿ-ում պաղեստինյան պատվիրակության անդամների վիզաները:

Գործակալությունը հիշեցնում է, որ Մանսուրը նախկինում հետ էր կանչել իր թեկնածությունը ՄԱԿ-ի Գլխավոր ասամբլեայի նախագահի պաշտոնում, սակայն Վաշինգտոնը վախենում է, որ նրա ընտրությունը, նույնիսկ ավելի ցածր պաշտոնում, կարող է հանգեցնել նրան, որ Գլխավոր ասամբլեայի առանձին նիստերը նախագահելու է պաղեստինցի ներկայացուցիչը: