Ծննդաբերությունից հետո մահացած 27-ամյա կնոջ գործով բացահայտվել է բժիշկների ճակատագրական սխալը

Ռոստովի մարզում փորձագետները պարզել են ծննդաբերությունից հետո մահացած 27-ամյա Աննայի ողբերգության պատճառը։ Ինչպես հայտնում են ռուսական լրատվամիջոցները, կնոջ մահվան հիմքում ընկած է եղել բժշկական սխալ՝ ողնուղեղային խողովակի մեջ սխալ դեղամիջոցի ներարկումը։

Փորձաքննության տվյալներով՝ էպիդուրալ անզգայացման փոխարեն կնոջը ներարկել են տրանեքսամաթթու, որը նախատեսված է արյունահոսությունը կանգնեցնելու, այլ ոչ թե ցավազրկման համար։ Սխալ ներարկումը հանգեցրել է գլխուղեղի ծանր վնասման և կոմայի։ Այժմ քննությունը փորձում է պարզել, թե կոնկրետ որ բուժաշխատողների գործողություններն են հանգեցրել ողբերգությանը։

Կինը ծննդատուն էր տեղափոխվել ապրիլի 5-ին։ Նրա հարազատների խոսքով՝ նա ժամեր շարունակ հեռախոսով բողոքել էր անտանելի ցավերից, չնայած նրան մի քանի անգամ կատարել էին էպիդուրալ ցավազրկում։ Ավելի ուշ ամուսինը հիվանդանոցում տեղեկացել էր, որ կինը մահացել է, իսկ երեխային բժիշկները փրկել են կեսարյան հատման միջոցով։ Դեպքի առթիվ հարուցվել է քրեական գործ՝ անզգուշությամբ մահ պատճառելու հոդվածով, հայտնում է Lenta.ru-ն։