Զախարովան մեղադրել է Զելենսկուն սուտ խոսելու մեջ

Ռուսաստանի արտգործնախարարության պաշտոնական ներկայացուցիչ Մարիա Զախարովան հայտարարել է, որ Ուկրաինայի նախագահ Վլադիմիր Զելենսկին չի կատարել Օդեսայի Արհմիությունների տան ողբերգության հետ կապված իր նախընտրական խոստումները։ Այս մասին հայտնում է РИА Новости-ն։

Բրիֆինգի ընթացքում Զախարովան հիշեցրել է Զելենսկու նախընտրական հարցազրույցներից մեկը, որտեղ նա խոստանում էր ապահովել 2014 թվականի մայիսի 2-ին Օդեսայում տեղի ունեցած ողբերգության հանգամանքների արդյունավետ և անաչառ քննություն։ Ռուս պաշտոնյայի խոսքով՝ զոհերի ընտանիքները մինչ օրս արդարության չեն հասել։

«Ավելին՝ Զելենսկու օրոք նեոնացիզմը դարձել է պետական քաղաքականության հիմքերից մեկը, իսկ 2014 թվականի մայիսի 2-ի իրադարձությունների համար պատասխանատու գաղափարական խմբերը իրենց լիովին ազատ են զգում», — հայտարարել է Զախարովան։ Ավելի վաղ նա նաև քննադատել էր Գերմանիային՝ մեղադրելով Բեռլինին ԽՍՀՄ-ը նացիստական Գերմանիայի հետ նույնացնելու քաղաքականություն վարելու մեջ։