Իտալիայից՝ հաղթանակով. 11 հայ մարզիկ Հայաստան վերադարձավ 13 ոսկե և 2 արծաթե մեդալներով

Գունֆուի աշխարհի 22-րդ առաջնությունում (Իտալիա) Հայաստանի Ուշու-Գունֆու ազգային ֆեդերացիայի հավաքականը (մարզիչներ՝ Տիգրան Չոբանյան և Սիրանուշ Նիկողոսյան) փայլուն ելույթ ունեցավ՝ նվաճելով 13 ոսկե և 2 արծաթե մեդալ։

2026 թ. մայիսի 15–17-ը իտալական Պերուջա քաղաքը վերածվել էր չինական մարտարվեստների համաշխարհային կենտրոնի՝ հյուրընկալելով Գունֆուի աշխարհի 22-րդ առաջնությունը, որին մասնակցում էին 16 երկրներ ներկայացնող 98 մարզական ակումբներ և ընդհանուր առմամբ 988 մարզիկներ։ Բարձրակարգ կազմակերպչական աշխատանքը, 45 մրցավարների, 30 կին դատավորների և փորձառու տեխնիկական անձնակազմի ներգրավվածությունը մրցաշարին հաղորդեցին միջազգային բարձր մակարդակ և մրցակցային լարված մթնոլորտ։

Հայաստանի հավաքականը մրցահարթակում դրսևորեց մարտական բարձր պատրաստվածություն, թիմային ամուր համախմբվածություն և հաղթողի անկոտրում հոգեբանություն։ Մեր մարզիկները յուրաքանչյուր ելույթում և մենամարտում պայքարեցին մինչև վերջին վայրկյանը՝ ցուցադրելով տեխնիկական վարպետություն, տակտիկական գրագետ մոտեցում և կամային բացառիկ հատկանիշներ։

Միջազգային կարգի սպորտի վարպետ Լիանա Վարդանյանը դարձավ առաջնության ամենավառ աստղերից մեկը՝ նվաճելով 5 ոսկե մեդալ, այդ թվում՝ «Վինգչուն» (5 մասնակից) և «Սինիցուան» (9 մասնակից) ոճերում։ Հատկանշական է, որ նշված կարգերում Հայաստանի ազգային հավաքականը հանդես էր գալիս առաջին անգամ։ Իր հաղթանակները Լիանա Վարդանյանը նվիրեց հետախույզ, փոխգնդապետ, 44-օրյա պատերազմում զոհված Վահագն Թումասյանի լուսավոր հիշատակին։

Թիմի ամենակրտսեր մասնակիցը՝ 11-ամյա Արևիկ Այվազյանը (մարզիչ՝ Տիգրան Չոբանյան), Շաոլինցուան ոճի զույգ դանակներով վարժահամալիրում վստահ ու տպավորիչ ելույթ ունեցավ՝ արժանանալով ոսկե մեդալի և աշխարհի չեմպիոնի կոչման։

Արարատի մարզի Արմաշ գյուղը ևս փայլուն արդյունք գրանցեց՝ միանգամից ունենալով երեք աշխարհի չեմպիոն՝ Վանիկ Սիմոնյանին, Հակոբ Շահնազարյանին և Արման Մուրադյանին (մարզիչ՝ Սիրանուշ Նիկողոսյան)։ Մյուս մարզիկները ներկայացնում էին Երևանը, Գյումրին, Երասխը, Սևակավանը ու Սուրենավանը։

Հայ մարզիկների արդյունքները.

• Լիանա Վարդանյան՝ 5 ոսկե մեդալ «Սինիցուան», «Թայձիցուան առանց զենքի», «Թայձիցուան նեղ թրով», «Թայձիցուան լայն թրով», «Վինգչուն» մարզաձևերում,
• Արևիկ Այվազյան՝ ոսկե մեդալ «Շաոլին վուդանգ ցուան զույգ դանակով» մարզաձևում,
• Սանդա-Ուշու մարզաձևում՝ Արման Խաչատրյան (ոսկի), Արմեն Առաքելյան (ոսկի), Վանիկ Սիմոնյան (ոսկի), Հակոբ Շահնազարյան (ոսկի), Արման Մուրադյան (ոսկի), Կարապետ Ջաջիկյան (ոսկի), Ալիկ Էլիազյան (ոսկի), Ջիվան Ազոյան (արծաթ), Արամ Օղիկյան (արծաթ)։

Հայաստանի Ուշու-Գունֆու ազգային ֆեդերացիայի նախագահ և հավաքականի գլխավոր մարզիչ Տիգրան Չոբանյանը բարձր գնահատեց թիմի ելույթը՝ ընդգծելով, որ արձանագրված հաղթանակները նվիրվում են Արցախյան պատերազմներում զոհված և անհետ կորած մեր հերոս հայորդիների ու հայուհիների հիշատակին։

«Մեր հայրենասեր թիմը աշխարհի առաջնությունում հանդես եկավ արժանապատվորեն՝ հանուն Հայրենիքի, ազգային ինքնության և հայկական մարտական ոգու։ Խոնարհվում եմ և խորին շնորհակալություն եմ հայտնում թիմի բոլոր անդամներին՝ իրենց նվիրումի, կարգապահության և հաղթական կամքի համար։ Աստված պահապան լինի հայ ազգին ու Հայաստանին», — նշեց վաստակաշատ մարզիչը։