ՌԴ-ում հայտարարել են, որ ուկրաինական հարվածները խոչընդոտում են խաղաղ բանակցություններին

Ռուսաստանի Պետդումայի միջազգային հարցերով հանձնաժողովի նախագահի առաջին տեղակալ Սվետլանա Ժուրովան հայտարարել է, որ ուկրաինական անօդաչու թռչող սարքերի հարվածները քաղաքացիական օբյեկտներին հեռացնում են խաղաղ բանակցությունների հնարավորությունը։ Այս մասին փոխանցում է «Лента.ру»-ն։

Ժուրովան մեկնաբանել է Սամարայի մարզի վրա իրականացված հարձակումը՝ նշելով, որ նման գործողությունները, իր կարծիքով, նպատակ ունեն վախեցնել և ցույց տալ Ուկրաինայի ռազմական հնարավորությունները։ «Սա, ցավոք, չի մոտեցնում խաղաղ բանակցությունները», — ասել է ռուս պատգամավորը։

Նրա խոսքով՝ Կիևը փորձում է սադրել Մոսկվային՝ ստիպելով ռուսական բանակին կիրառել ավելի ծանր զինատեսակներ։ Միևնույն ժամանակ Ժուրովան հայտարարել է, որ Ռուսաստանը, իր խոսքով, չի օգտագործում այնպիսի զենք, որը կարող էր մեծ վնաս հասցնել խաղաղ բնակչությանը։ Ավելի վաղ Սամարայի մարզի նահանգապետ Վյաչեսլավ Ֆեդորիշչևը հայտնել էր, որ մայիսի 21-ի գիշերը Սիզրան քաղաքի վրա իրականացված հարձակման հետևանքով զոհվել է երկու մարդ։