Եվրահանձնաժողովը կանխատեսել է Ռուսաստանի տնտեսության աճի դանդաղում և գնաճի նվազում

Եվրահանձնաժողովը հրապարակել է Ռուսաստանի տնտեսության վերաբերյալ նոր կանխատեսում, ըստ որի՝ 2026 թվականին երկրի ՀՆԱ-ի աճը կհասնի 1,3 տոկոսի, իսկ 2027-ին կդանդաղի մինչև 1,1 տոկոս։ Այս մասին նշվում է Եվրահանձնաժողովի զեկույցում։

Փաստաթղթի հեղինակների կարծիքով՝ արևմտյան պատժամիջոցները խորացրել են վերջին տարիներին ռուսական տնտեսությունում կուտակված անհավասարակշռությունները։ Եվրահանձնաժողովի տվյալներով՝ 2026 թվականի առաջին եռամսյակում մի շարք տնտեսական ցուցանիշներ շարունակում էին թույլ մնալ, այդ թվում՝ ՀՆԱ-ի աճն ու արդյունաբերության PMI ինդեքսը։ Բացի այդ, բիզնեսի վստահությունը նվազել է՝ հասնելով 2022 թվականի վերջից ի վեր ամենացածր մակարդակին։

Միևնույն ժամանակ Եվրահանձնաժողովը կանխատեսում է, որ Ռուսաստանում ներդրումները աստիճանաբար կաճեն՝ դրամավարկային քաղաքականության բարելավման և ածխաջրածինների արտահանումից եկամուտների ավելացման ֆոնին։ РИА Новости-ի փոխանցմամբ՝ գործազրկությունը 2027 թվականին կկազմի ընդամենը 2,4 տոկոս, իսկ գնաճը կշարունակի նվազել՝ 2026-ին կազմելով միջինը 5,7 տոկոս, իսկ 2027-ին՝ 4,8 տոկոս։ Ռուսաստանի Կենտրոնական բանկն էլ ավելի վաղ հայտարարել էր, որ նախատեսում է գնաճը վերադարձնել 4 տոկոսի մակարդակին մինչև 2027 թվականը։