Կրեմլը պատրաստակամություն է հայտնել բանակցել Եվրոպայի հետ

Ռուսաստանը պատրաստ է երկխոսության եվրոպական երկրների հետ և լսում է Մոսկվայի հետ բանակցությունների անհրաժեշտության մասին հնչող հայտարարությունները։ Այս մասին հայտնում է РИА Новости-ն՝ հղում անելով Կրեմլի մամուլի քարտուղար Դմիտրի Պեսկովին։

Պեսկովը նշել է, որ վերջին շաբաթներին նման հայտարարություններով հանդես են եկել Ֆինլանդիայի նախագահ Ալեքսանդր Ստուբբը և նաև գերմանացի քաղաքական գործիչներ։ «Ռուսները պատրաստ են խոսակցության», — հայտարարել է Կրեմլի ներկայացուցիչը՝ ընդգծելով, որ երկխոսությունը միշտ ավելի լավ է, քան «ամբողջական դիմակայությունը»։

Ավելի վաղ Politico-ն գրել էր, որ Եվրոպայում շարունակվում են քննարկումները այն մասին, թե ով կարող է դառնալ Եվրամիության գլխավոր բանակցողը Ռուսաստանի հետ հարաբերություններում։ Քննարկվող թեկնածուների թվում են Գերմանիայի նախկին կանցլեր Անգելա Մերկելը, Ֆինլանդիայի նախագահ Ալեքսանդր Ստուբբը և Իտալիայի նախկին վարչապետ Մարիո Դրագին։ Սակայն, ըստ պարբերականի, ԵՄ երկրների միջև դեռ չկա միասնական համաձայնություն թեկնածուի հարցում։