Ռուսաստանում Տուսկի հայտարարությունները որակել են որպես Մոսկվայի դեմ ճնշման փորձ

Ռուս քաղաքագետ Գեորգի Դիբրովը հայտարարել է, որ Լեհաստանի վարչապետ Դոնալդ Տուսկի՝ Ուկրաինայի պատերազմի վերաբերյալ կոշտ արձագանքի մասին հայտարարությունները կարելի է դիտարկել որպես Ռուսաստանի նկատմամբ սադրանքի և շանտաժի փորձ։ Այս մասին նա ասել է «Лента.ру»-ի հետ զրույցում։

Քաղաքագետի կարծիքով՝ Եվրոպական միությունը փորձում է ներգրավվել Ուկրաինայի շուրջ բանակցային գործընթացում, մինչդեռ աշխարհաքաղաքական հիմնական գործընթացները տեղի են ունենում առանց «հին Եվրոպայի» ակտիվ մասնակցության։ Դիբրովը նշել է, որ Լեհաստանը միաժամանակ զարգացնում է պաշտպանական համագործակցությունը ԱՄՆ-ի հետ և մասնակցում «Մեծ Բրիտանիա–Լեհաստան–Ուկրաինա» ձևաչափին, որը, նրա խոսքով, ստեղծվել է Ռուսաստանի դեմ դիմակայության համար։

Փորձագետը նաև հայտարարել է, որ ՆԱՏՕ-ի և Ռուսաստանի միջև ուղիղ բախման հավանականությունը մոտակա տարիներին ցածր է, քանի որ դաշինքը, ըստ նրա, չունի բավարար ռեսուրսներ իրավիճակի կտրուկ սրման համար։ Նրա խոսքով՝ ՆԱՏՕ-ի առաջնորդները ներկայումս սահմանափակվում են կոշտ հայտարարություններով և քաղաքական ճնշման մեթոդներով։ Ավելի վաղ Դոնալդ Տուսկը հայտարարել էր, որ Ուկրաինայի շուրջ հակամարտությունը կարող է ստիպել Լեհաստանին արձագանքել ավելի վճռական ձևով, իսկ ՆԱՏՕ-ն լրջորեն է վերաբերվելու ցանկացած հնարավոր սպառնալիքի։