Գիտնականները բացահայտել են լյարդի ճարպակալման վտանգավոր հետևանքը

Լյարդի ճարպակալումը կարող է զգալիորեն բարձրացնել ինֆարկտի, սրտային նոպաների և այլ վտանգավոր սրտանոթային բարդությունների ռիսկը։ Այս եզրակացությանն են եկել գիտնականները, որոնց հետազոտությունը հրապարակվել է Clinical Gastroenterology and Hepatology (CGH) գիտական ամսագրում։

Հետազոտության ընթացքում ուսումնասիրվել են կրծքավանդակի ցավերով հետազոտված շուրջ 3,6 հազար հիվանդների տվյալներ։ Գիտնականները համակարգչային տոմոգրաֆիայի միջոցով գնահատել են սրտի կորոնար անոթների վիճակը և միաժամանակ ստուգել լյարդի ճարպակալման առկայությունը։ Պարզվել է, որ մասնակիցների ավելի քան մեկ քառորդի մոտ առկա են եղել հիվանդության նշաններ։ CGH-ի փոխանցմամբ՝ լյարդի ճարպակալում ունեցող մարդկանց անոթներում վտանգավոր, հեշտ վնասվող թիթեղների ծավալը միջինը 24 տոկոսով ավելի բարձր է եղել։

Հետազոտողները նաև պարզել են, որ լյարդի ճարպակալում ունեցող մարդկանց մոտ մահվան, ինֆարկտի և անկայուն ստենոկարդիայի պատճառով հոսպիտալացման դեպքերը գրեթե կրկնակի հաճախ են գրանցվել։ Նույնիսկ մյուս ռիսկային գործոնները հաշվի առնելուց հետո հիվանդությունը կապված է եղել սրտանոթային վտանգավոր բարդությունների ռիսկի 69 տոկոս աճի հետ։ Գիտնականների կարծիքով՝ լյարդի ճարպակալումը պետք է դիտարկել ոչ միայն որպես լյարդի, այլ նաև սրտի և անոթների առողջության խնդիր։