Մերցի՝ Ուկրաինային ԵՄ-ում «առանց ձայնի» կարգավիճակ տալու գաղափարը քննադատության է արժանացել

Ռուս քաղաքագետ Իվան Մեզյուխոն կոշտ քննադատության է ենթարկել Գերմանիայի կանցլեր Ֆրիդրիխ Մերցի առաջարկը՝ Ուկրաինային տրամադրել Եվրամիությունում ասոցացված անդամի կարգավիճակ՝ առանց քվեարկության իրավունքի։ «Лента.ру»-ի հետ զրույցում նա հայտարարել է, որ Կիևին փաստացի առաջարկում են «աթոռակ Եվրամիության սեղանի կողքին», բայց ոչ լիարժեք մասնակցություն։

Ավելի վաղ հայտնի էր դարձել, որ Մերցը կողմ է, որպեսզի Ուկրաինան մասնակցի ԵՄ նիստերին, ունենա ներկայացուցիչներ Եվրախորհրդարանում և նույնիսկ ասոցացված դատավոր Եվրոպական դատարանում, սակայն չունենա որոշումների վրա ազդելու իրավունք։ Քաղաքագետի կարծիքով՝ այս նախաձեռնությունը ոչ մի իրական նոր արտոնություն չի տալիս Կիևին և ավելի շատ տեղեկատվական քայլ է։

Մեզյուխոն նաև հիշեցրել է, որ Ուկրաինան դեռ 2017 թվականից ունի Եվրամիության հետ ասոցացման համաձայնագիր, և հարց է առաջանում, թե ինչով պետք է տարբերվի Մերցի առաջարկած նոր կարգավիճակը ներկայիս ձևաչափից։ Նրա խոսքով՝ նման մոտեցումը կարող է դժգոհություն առաջացնել նաև Թուրքիայի մոտ, որը տասնամյակներ շարունակ սպասում է Եվրամիության լիարժեք անդամակցության։