Համաշխարհային մամուլը քննարկում է Պուտինի Չինաստան այցը․ ինչու Պեկինը նրան ավելի ջերմ ընդունեց, քան Թրամփին

Ռուսաստանի նախագահ Վլադիմիր Պուտինի այցը Չինաստան դարձել է միջազգային մամուլի գլխավոր թեմաներից մեկը։ Համաշխարհային խոշոր լրատվամիջոցները նշում են, որ Պեկինը ռուս առաջնորդին ցուցաբերել է առավել ջերմ և ընդգծված ընդունելություն, քան օրեր առաջ Չինաստան այցելած ԱՄՆ նախագահ Դոնալդ Թրամփին։ Ինչպես գրում է The Guardian-ը, Թրամփին օդանավակայանում դիմավորել էր Չինաստանի փոխնախագահը, մինչդեռ Պուտինին՝ Չինաստանի կոմունիստական կուսակցության բարձրագույն ղեկավար կազմի ազդեցիկ ներկայացուցիչը, ինչը դիտարկվել է որպես քաղաքական ազդակ Մոսկվայի նկատմամբ Պեկինի առանձնահատուկ վերաբերմունքի մասին։

Իտալական L'Antidiplomatico պարբերականը գրում է, որ Պուտինի և Սի Ցզինպինի հանդիպումը հստակ ուղերձ էր Արևմուտքին՝ ցույց տալու, որ Ռուսաստանն ու Չինաստանը վարում են անկախ և սուվերեն արտաքին քաղաքականություն։ Չինական Global Times-ն էլ ընդգծել է, որ ռուս-չինական հարաբերությունները հասել են պատմական ամենաբարձր մակարդակին։ Փորձագետների խոսքով՝ կողմերի միջև խորանում է ռազմավարական վստահությունը, իսկ համագործակցությունը կառուցվում է ոչ միայն կարճաժամկետ շահերի, այլ երկարաժամկետ աշխարհաքաղաքական հաշվարկների վրա։

CNN-ը և The New York Times-ը ևս ուշադրություն են հրավիրել այն հանգամանքի վրա, որ Պուտինի այցն ավելի ոչ պաշտոնական և ընկերական մթնոլորտում է անցել, քան Թրամփինը։ NYT-ի փոխանցմամբ՝ Սի Ցզինպինը նույնիսկ թեյախմության էր հրավիրել Պուտինին, որտեղ նրանք միասին դիտել են նախկին հանդիպումների լուսանկարները։ Իսկ Al Jazeera-ն նշել է, որ ԱՄՆ նախագահի անկանխատեսելի արտաքին քաղաքականությունը վերջին տարիներին ավելի է մոտեցրել Մոսկվային և Պեկինին՝ ընդհանուր տնտեսական և ռազմավարական շահերի շուրջ։