Թուրքիայում կասկածի տակ են դրել «թյուրքական ՆԱՏՕ»-ի ստեղծման հեռանկարները

Թուրք փորձագետ Մեհմեթ Էգյութչուն հայտարարել է, որ Թյուրքական պետությունների կազմակերպության (ԹՊԿ) անդամ երկրների միջև ռազմական համագործակցությունը մեծ հեռանկար չունի, չնայած մշակութային և լեզվական կապերը բավականին ամուր են։ Այս մասին նա ասել է «II Շլիկովյան ընթերցումներ» միջազգային գիտաժողովի ընթացքում, փոխանցում է «Лента.ру»-ն։

Էգյութչուի խոսքով՝ ԹՊԿ անդամ երկրները՝ Թուրքիան, Ղազախստանը, Ղրղզստանը, Ուզբեկստանը և Ադրբեջանը, աշխարհագրորեն գտնվում են Չինաստանի, Ռուսաստանի և Հնդկաստանի ազդեցության գոտիներում, իսկ Թուրքիան անմիջական սահման չունի Կենտրոնական Ասիայի թյուրքալեզու պետությունների հետ։ Նրա գնահատմամբ՝ Անկարան կարող է այդ երկրներին զենք մատակարարել, սակայն իրական ռազմական սպառնալիքի դեպքում չի կարողանա արդյունավետ աջակցություն ցուցաբերել։

Փորձագետը նաև նշել է, որ կազմակերպության «թյուրքական» անվանումը կարող է անհանգստություն առաջացնել Ռուսաստանի, Չինաստանի և Հնդկաստանի մոտ։ Նրա խոսքով՝ Չինաստանը մտահոգված է ույղուրների հարցով, Ռուսաստանը՝ իր թյուրքալեզու և մուսուլմանական տարածաշրջաններով, իսկ Հնդկաստանը ևս զգայուն է նման միավորումների նկատմամբ։ Ավելի վաղ ռուս քաղաքական վերլուծաբան Բոգդան Բեզպալկոն հայտարարել էր, որ Թուրքիան երկարաժամկետ հեռանկարում կարող է փորձել ստեղծել նախկին ԽՍՀՄ տարածքում նոր ռազմական բլոկ՝  «թյուրքական ՆԱՏՕ»։