Ռուսաստանում կասկածի տակ են դրել Եվրամիության խաղաղության մասին հայտարարությունները

Դոնեցկի Ժողովրդական Հանրապետության ներկայացուցիչ, ռուս սենատոր Ալեքսանդր Վոլոշինը հայտարարել է, որ Եվրամիությունը փաստացի պատրաստվում է Ուկրաինայի պատերազմի շարունակությանը նաև 2026 և 2027 թվականներին՝ չնայած խաղաղության մասին հրապարակային հայտարարություններին։ Այս մասին նա ասել է «Лента.ру»-ին տված հարցազրույցում։

Վոլոշինի խոսքով՝ եթե Բրյուսելն իսկապես հավատում է բանակցություններին, ապա անհասկանալի է, թե ինչու է նախապես պատրաստվում երկարատև հակամարտության։ Նրա կարծիքով՝ Եվրահանձնաժողովը Ուկրաինայի ճգնաժամը դիտարկում է ոչ թե որպես ողբերգություն, որը պետք է դադարեցնել, այլ որպես քաղաքական և տնտեսական գործիք՝ ներքին խնդիրներ լուծելու համար։

Սենատորը պնդել է, որ հակամարտությունն օգտագործվում է ռազմական արդյունաբերությանը միլիարդավոր եվրոներ ուղղելու, քաղաքական մրցակիցներին թուլացնելու և եվրոպական բյուրոկրատիայի ազդեցությունն ուժեղացնելու նպատակով։ Վոլոշինի գնահատմամբ՝ եվրոպական ներկայիս էլիտայի համար խաղաղությունն ավելի վտանգավոր է, քան պատերազմի շարունակությունը, քանի որ պատերազմի ավարտից հետո հասարակությունը կսկսի պահանջել պատասխաններ տնտեսական և քաղաքական կորուստների համար։