Ռուսաստանում կտրուկ աճել է Ճապոնիայից ներմուծվող օգտագործված մեքենաների թիվը

2026 թվականի առաջին չորս ամիսներին Ճապոնիայից Ռուսաստան է ներմուծվել ավելի քան 72 հազար օգտագործված մարդատար ավտոմեքենա, որոնց շահագործման ժամկետը գերազանցում է երեք տարին։ Նախորդ տարվա նույն ժամանակահատվածի համեմատ ցուցանիշն աճել է 34 տոկոսով։ Տվյալները հրապարակել է ավտոշուկայի վերլուծաբան Սերգեյ Ցելիկովը։

Ներմուծված մեքենաների շարքում առաջին տեղում է Toyota-ն՝ 23 334 ավտոմեքենայով։ Երկրորդ տեղում Honda-ն է, որը գրեթե հավասարվել է առաջատարին՝ ներմուծելով 22 639 մեքենա։ Այս երկու բրենդներին բաժին է ընկել ամբողջ ներմուծման գրեթե երկու երրորդը։ Լավագույն հնգյակում ընդգրկվել են նաև Suzuki-ն, Mazda-ն և գերմանական Volkswagen-ը, որը կարողացել է առաջ անցնել Nissan-ից ու Mitsubishi-ից։

Մոդելների շարքում բացարձակ առաջատարը Honda Freed-ն է՝ ավելի քան 6300 ներմուծված օրինակով։ Վերլուծաբանները չեն բացառում, որ 2026 թվականի արդյունքներով Honda-ն կարող է նույնիսկ շրջանցել Toyota-ին՝ Ռուսաստանի շուկայում ներմուծումների ընդհանուր ծավալով։ Միաժամանակ Ռուսաստանում շարունակում է աճել նաև չինական օգտագործված մեքենաների պահանջարկը․ տարվա առաջին ամիսներին դրանց վաճառքն աճել է ավելի քան 45 տոկոսով։