Արևմուտքում Ռուսաստանին մեղադրել են Մերցի հեղինակությունը խաթարելու փորձի մեջ

Ռուսաստանը փորձում է «թուլացնել» Գերմանիայի կանցլեր Ֆրիդրիխ Մերցի դիրքերը՝ «Գերմանիայի համար այլընտրանք» (AfD) ընդդիմադիր կուսակցությանն աջակցելու համար, գրում է Politico-ն։

Թերթը գրում է, որ Գերմանիայում կանցլերի ժողովրդականության անկման հետ մեկտեղ՝ Ռուսաստանը «ակտիվացրել է իր ջանքերը» նրա «անկումը» արագացնելու համար։ Լրագրողները նշում են, որ Մոսկվան «մեծացրել է ճնշումը» Մերցի վրա՝ կտրելով Ղազախստանից դեպի Արևելյան Գերմանիա նավթի մատակարարումները և փորձելով «բաժանել» երկրի հասարակական կարծիքը՝ նախկին Գերմանիայի կանցլեր Գերհարդ Շրյոդերի՝ որպես ԵՄ-ի հետ բանակցող պոտենցիալ անձի մասին հայտարարություններով։

Politico-ն նաև նշել է, որ AfD կուսակցությունը ներկայացված կլինի Սանկտ Պետերբուրգի միջազգային տնտեսական ֆորումում։

«Պուտինի ռազմավարությունն է շահագործել Մերցի քաղաքական թուլությունները, մասնավորապես՝ Գերմանիայի դժգոհությունը տնտեսության վիճակից, և սրել Բեռլինի կողմից Ուկրաինային ռազմական աջակցության շուրջ տարաձայնությունները», - նշում է թերթը։