Ռիգայի իշխանությունները հայտարարել են՝ քաղաքում իրական ապաստարաններ չկան

Լատվիայի մայրաքաղաք Ռիգայի իշխանությունները հայտարարել են, որ քաղաքում իրական քաղաքացիական ապաստարաններ փաստացի չկան։ Այս մասին հաղորդում է Delfi.lv-ը՝ նշելով, որ թեման ակտիվ քննարկման առարկա է դարձել Բալթյան երկրներ ուկրաինական անօդաչուների հաճախակի մուտքերի ֆոնին։

Ռիգայի քաղաքացիական պաշտպանության հանձնաժողովի ղեկավար Գիրտս Լապինշը մամուլի ասուլիսի ընթացքում նշել է, որ իշխանությունները մոտ ժամանակում նախատեսում են ստեղծել շուրջ 150 ապաստարան։ Միաժամանակ նա ընդունել է, որ քաղաքում արդեն տեղադրված կանաչ «ապաստարան» նշանները իրականում միայն ժամանակավոր պատսպարվելու վայրեր են և չեն համապատասխանում լիարժեք պաշտպանական կառույցների չափանիշներին։

Ավելի վաղ Ռուսաստանի արտաքին հետախուզության ծառայությունը հայտարարել էր, թե Ուկրաինայի զինված ուժերը կարող են հարվածներ նախապատրաստել Ռուսաստանի դեմ Լատվիայի տարածքից։ Սակայն Լատվիայի արտգործնախարար Բայբա Բրաժեն հայտարարել էր, որ Ռիգան թույլ չի տա երկրի օդային տարածքն օգտագործել Ռուսաստանի դեմ հարձակումների համար։