75-ամյա կինը պատվերի պատճառով ծեծկռտուք է կազմակերպել սրճարանում և մահացել է սրտի կաթվածից

ԱՄՆ Ինդիանա նահանգի Ֆորտ-Ուեյն քաղաքում 75-ամյա Անիտա Գրեյսոնը մահացել է սրտի կաթվածից՝ սրճարանում տեղի ունեցած ծեծկռտուքից հետո։ Այս մասին հայտնում է New York Post-ը։

Դեպքը տեղի է ունեցել մայիսի 13-ին Tim Hortons սրճարանում։ Ըստ տեղեկությունների՝ կինը դժգոհ է եղել իր պատվերից և ավտոմեքենաների սպասարկման հատվածից ներխուժել է սրճարանի ներս։ Նա սկսել է վիճել և վիրավորել աշխատակիցներին։ Երբ 20-ամյա մենեջերը փորձել է հանգստացնել իրավիճակը և խնդրել նրան հեռանալ, տարեց կինը հարձակվել է նրա վրա։ Նշվում է, որ նա հարվածել է աշխատակցին, վնասել ակնոցը և քաշքշոցի ընթացքում պոկել մազերի մի հատված։

Դեպքի վայր ժամանած ոստիկանները Գրեյսոնին գտել են անգիտակից վիճակում։ Կնոջը տեղափոխել են հիվանդանոց, սակայն բժիշկներին չի հաջողվել փրկել նրա կյանքը։ Ավելի ուշ հրապարակված տեսախցիկների կադրերում երևում է, որ ծեծկռտուքից հետո կինը նստել է սեղանի մոտ, ինչ-որ մեկին զանգահարել, իսկ մոտ տասը րոպե անց ընկել է հատակին։ Նրա դուստրը հայտնել է, որ մայրը երկար տարիներ սրտային հիվանդություն ուներ։