Axios. Թրամփը կոչ է արել արաբական երկրներին միանալ Աբրահամի համաձայնագրերին

ԱՄՆ նախագահ Դոնալդ Թրամփը Մերձավոր Արևելքի մի քանի երկրների և Պակիստանի ղեկավարների հետ հեռախոսազրույցի ժամանակ կոչ է արել նրանց միանալ Աբրահամի համաձայնագրերին՝ Իսրայելի հետ հարաբերությունները կարգավորելու համար, եթե Վաշինգտոնն ու Թեհրանը խաղաղության համաձայնագրի հասնեն, հաղորդում է Axios-ը՝ հղում անելով երկու ամերիկացի պաշտոնյաների։

Պաշտոնյայի խոսքով՝ Բահրեյնի, Եգիպտոսի, Հորդանանի, Կատարի, ԱՄԷ-ի, Պակիստանի, Սաուդյան Արաբիայի և Թուրքիայի ղեկավարների հետ մայիսի 23-ին հեռախոսազրույցի ժամանակ ԱՄՆ նախագահը հույս է հայտնել, որ Իրանի հետ հակամարտության ավարտից հետո այն երկրները, որոնք չեն մասնակցել Աբրահամի համաձայնագրերին կամ չունեն խաղաղության պայմանագիր Իսրայելի հետ, կկարգավորեն իրենց հարաբերությունները Թել Ավիվի հետ։

Պորտալը հաղորդում է, որ Կատարի, Պակիստանի և Սաուդյան Արաբիայի ներկայացուցիչները, որոնք դիվանագիտական ​​հարաբերություններ չունեն Իսրայելի հետ, զարմացած էին Թրամփի խնդրանքից։ «Հեռախոսազրույցում լռություն էր, և Թրամփը կատակեց՝ հարցնելով, թե արդյոք բոլորը դեռ կապի մեջ են», – Axios-ին ասել է պաշտոնյաներից մեկը։

Ամերիկացի առաջնորդը նշել է, որ այս երկրների և Իսրայելի միջև հարաբերությունների կարգավորման հարցը առաջիկա շաբաթներին կքննարկեն նախագահի հատուկ դեսպանորդ Սթիվ Ուիթքոֆը և ձեռնարկատեր Ջարեդ Քուշները։