Air India-ի ինքնաթիռը Օմանի օդանավակայանում բախվել է լուսանշաններին և վնասվել

Air India Express ավիաընկերության ուղևորատար ինքնաթիռը Օմանի Մասկատ քաղաքի օդանավակայանում բախվել է թռիչքուղու լուսանշանային սարքավորումներին և վնասվել։ Aviation Herald-ի փոխանցմամբ՝ միջադեպը տեղի է ունեցել մայիսի 15-ին՝ Մասկատ-Կաննուր չվերթի ժամանակ, սակայն մանրամասները հրապարակվել են միայն այժմ։

Աղբյուրի տվյալներով՝ Boeing 737-800 ինքնաթիռի անձնակազմը ղեկային ուղուց դուրս գալուց հետո սխալ ուղղությամբ է մտել 26L թռիչքուղի, ինչի հետևանքով օդանավը անցել է լուսային սարքավորումների վրայով և վնասել մի քանի ազդանշանային լամպ։ Թռիչքի մեկնարկի ընթացքում օդաչուները լսել են ուժեղ հարված և ստացել վթարային ազդանշան, ինչից հետո անմիջապես դադարեցրել են արագացումը։

Հետագայում պարզվել է, որ օդանավի անվադողերը վնասվել են, իսկ հիդրավլիկ համակարգից ամբողջությամբ արտահոսք է տեղի ունեցել։ Չվերթը չեղարկվել է, իսկ ուղևորները մոտ երկու ժամ մնացել են անսարք ինքնաթիռի սրահում, հետո տեղափոխվել տերմինալ և տեղավորվել հյուրանոցներում։ Հաջորդ օրը թռիչքն իրականացվել է այլ ինքնաթիռով՝ շուրջ 13,5 ժամ ուշացմամբ։ Վնասված օդանավը մինչ այժմ գտնվում է Մասկատի օդանավակայանում, դեպքի առթիվ հետաքննություն է ընթանում։