Պուտինի որոշումից հետո հազարավոր Մերձդնեստրի բնակիչներ հերթագրվել են ՌԴ քաղաքացիություն ստանալու համար

Մոտ 20 հազար Մերձդնեստրի բնակիչ հերթագրվել է Ռուսաստանի քաղաքացիություն ստանալու համար՝ ՌԴ նախագահ Վլադիմիր Պուտինի ստորագրած նոր հրամանագրից հետո։ Այս մասին հայտնել է Մոլդովայում Ռուսաստանի դեսպանատունը՝ նշելով, որ դիմումների ընդունումն այժմ իրականացվում է փորձնական ռեժիմով։

Դիվանագիտական ներկայացուցչության տվյալներով՝ հետաքրքրությունը Ռուսաստանի քաղաքացիության պարզեցված կարգի նկատմամբ «աննախադեպ» է եղել։ Դեսպանատունը ընդգծել է, որ արդեն ավելի քան 20 հազար մարդ գրանցվել է էլեկտրոնային հերթում։

Ռուսական կողմը հայտարարել է, որ նման ակտիվությունը վկայում է Ռուսաստանի նկատմամբ բարձր վստահության մասին՝ որպես տարածաշրջանում խաղաղության երաշխավորի։ Հիշեցնենք, որ մայիսի 15-ին Վլադիմիր Պուտինը ստորագրել էր հրամանագիր, որով Մերձդնեստրի բնակիչների համար սահմանվում է ՌԴ քաղաքացիություն ստանալու հատուկ պարզեցված ընթացակարգ։ ՌԴ ԱԳՆ-ն էլ հավելել էր, որ Մերձդնեստրում ռուսաստանցիների դեմ ցանկացած ագրեսիա կստանա անհապաղ պատասխան։