Մերձավոր Արևելքի ճգնաժամը հարվածել է պարարտանյութերի արտադրությանը․ աշխարհում սննդի պակասի վտանգ են տեսնում

Աշխարհում ֆոսֆատային պարարտանյութերի արտադրությունը կտրուկ նվազում է՝ Մերձավոր Արևելքում լարվածության և Հորմուզի նեղուցի շուրջ ստեղծված իրավիճակի պատճառով։ Financial Times-ի փոխանցմամբ՝ խափանված մատակարարումները արդեն լուրջ խնդիրներ են ստեղծում գլոբալ գյուղատնտեսական շուկայի համար։

Պարբերականը գրում է, որ նավագնացության խոչընդոտների հետևանքով կտրուկ նվազել են ծծմբի մատակարարումները, որն անհրաժեշտ է ֆոսֆատային պարարտանյութերի արտադրության համար։ Այդ պարարտանյութերը լայնորեն կիրառվում են եգիպտացորենի, սոյայի, բրնձի և արմավենու յուղի մշակաբույսերի աճեցման մեջ։ Միաժամանակ ծծմբի պահանջարկը աճում է նաև մարտկոցների արտադրության և մետաղների վերամշակման ոլորտներում։

CRU խորհրդատվական ընկերության ներկայացուցիչ Քրիս Լոուսոնի խոսքով՝ ֆոսֆատների մատակարարման վիճակը «աղետալի» է։ ԱՄՆ-ի խոշոր արտադրող Mosaic-ը և մարոկկոյական OCP ընկերությունը արդեն կրճատել են արտադրության ծավալները, մինչդեռ Չինաստանը առնվազն մինչև օգոստոս դադարեցրել է հիմնական ֆոսֆատային պարարտանյութերի արտահանումը։ Միևնույն ժամանակ ծծմբի գինը մեկ տարվա ընթացքում 150-180 դոլարից հասել է 850-900 դոլարի մեկ տոննայի համար։ Փորձագետները զգուշացնում են, որ ստեղծված իրավիճակը կարող է հանգեցնել նաև ցորենի և եգիպտացորենի գների կտրուկ աճի ամբողջ աշխարհում։