Պետությունը և կառավարությունը կանգնած են քաղաքացիների կողքին՝ առողջապահությունը դարձնելով առավել հասանելի. Լենա Նանուշյան

Առողջապահության նախարարի առաջին տեղակալ Լենա Նանուշյանն ընդունել է Նյարդաբանության եվրոպական ակադեմիայի նախագահ, միջազգային առաջատար նյարդաբան Ելենա Մորոյին։

 Ողջունելով` Լենա Նանուշյանն ընդգծել է, որ միջազգային գործընկերների հետ համատեղ ծրագրերը կարևոր են առողջապահության համակարգի զարգացման համար: 

«Պետությունը և կառավարությունը կանգնած են քաղաքացիների կողքին՝ առողջապահությունը դարձնելով առավել հասանելի, արդյունավետ և կանխարգելման վրա հիմնված համակարգ։ Մեր միջազգային գործընկերների հետ համատեղ ծրագրերը կարևոր ներդրում են Հայաստանում նյարդաբանական ծառայությունների զարգացման և մարդկային կյանքերի փրկության գործում», — նշել է Լենա Նանուշյանը։ 

Հանդիպման ընթացքում քննարկվել են միջազգային համագործակցության շրջանակներում նախատեսվող կարևոր նախաձեռնությունները և առաջիկա ծրագրերը: 

Անդրադարձ է եղել նաև «Գլխուղեղի առողջության առաքելություն» ծրագրի շրջանակներում Հայաստանում Գլխուղեղի առողջության ազգային արշավի մեկնարկին ու իրականացումը՝ Նյարդաբանության եվրոպական ակադեմիայի և Եվրոպական խորհրդարանի նախաձեռնությամբ: 

Արշավի նպատակն է առաջնային օղակում գործիքակազմի ներդրման միջոցով բարձրացնել նյարդաբանական հիվանդությունների վերաբերյալ իրազեկվածությունը՝ նպաստելով մահացության, հիվանդացության և հաշմանդամության դեպքերի նվազեցմանը, կանխարգելման և կառավարման արդյունավետ համակարգերի ձևավորմանը։ 

Հանդիպման ավարտին կողմերը վերահաստատել են համագործակցության ընդլայնման պատրաստակամությունը՝ ընդգծելով գործընկերության շարունակականության կարևորությունը։