Ուռուցքաբանը զգուշացրել է՝ միզապարկի քաղցկեղի ախտանիշները հաճախ շփոթում են այլ հիվանդությունների հետ

Ուռուցքաբան և ուռուցքաբանական ուրոլոգ Ալեքսանդր Սիսոևը հայտարարել է, որ միզապարկի քաղցկեղի բազմաթիվ ախտանիշներ կարող են նման լինել այլ տարածված հիվանդությունների նշաններին, ինչի պատճառով մարդիկ հաճախ ուշացնում են բժշկական հետազոտությունը։ Բժիշկը այս մասին խոսել է «Լենտա.ռու»-ի հետ զրույցում։

Մասնագետի խոսքով՝ մեզում արյան առկայությունը և գոտկատեղի ցավերը շատերը կապում են երիկամների քարերի հետ՝ չդիմելով բժշկի։ Սակայն, ինչպես ընդգծել է Սիսոևը, հատկապես մեզում արյան հայտնվելը ամենակարևոր ազդանշաններից մեկն է և պահանջում է լիարժեք հետազոտություն՝ ուռուցքային գործընթացը բացառելու համար։

Բացի այդ, միզապարկի քաղցկեղի դեպքում կարող են դիտվել հաճախամիզություն, այրոց և որովայնի ստորին հատվածում անհարմարություն, որոնք հաճախ շփոթում են ցիստիտի հետ։ Տղամարդկանց մոտ հիվանդությունը երբեմն նմանվում է նաև պրոստատիտի կամ շագանակագեղձի ադենոմայի ախտանիշներին։ Բժիշկը զգուշացրել է, որ երկար ժամանակ նման նշանները «տարիքային խնդիր» համարելը կարող է վտանգավոր լինել, քանի որ դրանց հետևում երբեմն թաքնված է քաղցկեղ։