Սուդանում վառելիքի և պարարտանյութի թանկացումը սպառնում է նվազեցնել գյուղատնտեսական արտադրությունը

Սուդանի տարբեր շրջանների ֆերմերները հայտարարում են, որ Իրանի շուրջ հակամարտության հետևանքով համաշխարհային շուկայում վառելիքի և պարարտանյութերի գների աճը կստիպի այս ամռանը կրճատել ցանքատարածքները։ Reuters-ի փոխանցմամբ՝ դա կարող է ավելի սահմանափակել սննդամթերքի արտադրությունը մի երկրում, որտեղ պատերազմն արդեն առաջացրել է սուր պարենային ճգնաժամ։

Ութ ֆերմեր և ոլորտի փորձագետներ նշել են, որ ծախսերի աճը խորացնում է քաղաքացիական պատերազմի հետևանքները՝ հարված հասցնելով ինչպես ներքին սպառման հիմնական մշակաբույսերին՝ սորգոյին և կորեկին, այնպես էլ արտահանման կարևոր ապրանքներին, այդ թվում՝ քնջութին։ ՄԱԿ-ի տվյալներով՝ Սուդանը պարարտանյութերի պահանջարկի ավելի քան կեսը ապահովում է Պարսից ծոցի երկրներից, իսկ բանակի և «Արագ աջակցության ուժեր» (RSF) խմբավորման միջև պատերազմը երկիրը ամբողջությամբ կախված է դարձրել վառելիքի ներմուծումից։

Երկիրը արդեն գտնվում է համաշխարհային սննդային ճգնաժամի ամենախոցելի գոտիներից մեկում։ ՄԱԿ-ի աջակցությամբ գործող դիտորդական համակարգի գնահատմամբ՝ շուրջ 19,5 միլիոն մարդ՝ բնակչության ավելի քան 40 տոկոսը, բախվում է սովի ճգնաժամային մակարդակի, իսկ որոշ շրջաններում կա սովի վտանգ։ Սուդանում գյուղատնտեսությունը եկամտի հիմնական աղբյուրն է բնակչության մոտ երկու երրորդի համար, սակայն ոլորտը երկար տարիներ տուժել է վատ կառավարման և պատերազմների հետևանքով։ ՄԱԿ-ի Պարենի և գյուղատնտեսության կազմակերպության սննդային անվտանգության ավագ վերլուծաբան Սադիգ Էլամինը զգուշացրել է, որ ընդհանուր արտադրությունը կարող է նվազել առնվազն 40 տոկոսով։