Ստոմատոլոգը բացատրել է՝ ինչու պետք չէ ամաչել ատամնաբույժի մոտ հազվադեպ գնալուց

Ամերիկացի ստոմատոլոգ Շոն Դավայե Մոթլահը հայտարարել է, որ շատ մարդիկ խուսափում են ատամնաբույժի այցելությունից ոչ թե անփութության, այլ վախի և ամոթի զգացման պատճառով։ Այս մասին նա խոսել է Yahoo-ի հետ զրույցում։

Բժշկի խոսքով՝ մարդկանց մեծ մասը վախենում է ցավից, քննադատությունից կամ վատ ախտորոշում լսելուց։ Սակայն այդ ամենի հիմքում հաճախ ընկած է ամաչելու զգացումը, որը ժամանակի ընթացքում ավելի է խորանում։ Մոթլահը նշել է, որ շատ հիվանդներ նախապես համոզված են լինում, թե իրենց ատամներն արդեն հնարավոր չէ փրկել կամ բուժումը լինելու է երկար ու ծանր, մինչդեռ իրականում իրավիճակը հազվադեպ է այդքան ծայրահեղ լինում։

Ստոմատոլոգը կոչ է արել մարդկանց չամաչել բերանի խոռոչի առողջական խնդիրներից և չհետաձգել այցը բժշկի մոտ։ Նրա խոսքով՝ ժամանակակից ստոմատոլոգիան զգալիորեն նվազեցրել է ցավոտ միջամտությունների մակարդակը, իսկ ներկայիս տեխնոլոգիաները հնարավորություն են տալիս լուծել գրեթե բոլոր խնդիրները՝ նույնիսկ այն դեպքում, երբ մարդը երկար ժամանակ անտեսել է ատամների վիճակը։