Չինաստանը փորձում է փրկել տնտեսությունը․ տոկոսադրույքները կարող են հասնել պատմական նվազագույնի

Չինաստանի ժողովրդական բանկը քննարկում է բանկերին տրամադրվող մեկ տարվա վարկերի տոկոսադրույքը պատմական նվազագույն մակարդակի իջեցնելու հնարավորությունը։ Bloomberg-ի փոխանցմամբ՝ Պեկինը այս քայլով փորձում է խթանել դանդաղող տնտեսության աճը։

Ապրիլին Չինաստանի տնտեսությունը թուլացման նշաններ է ցույց տվել գրեթե բոլոր հիմնական ոլորտներում։ Ամենաթույլ ցուցանիշները գրանցվել են արդյունաբերական արտադրության և մանրածախ վաճառքի հատվածներում, ինչից հետո տնտեսագետները սկսել են կոչ անել իշխանություններին ավելի ակտիվ պետական աջակցություն ցուցաբերել տնտեսությանը։

Չինաստանի կենտրոնական բանկը իր վերջին եռամսյակային հաշվետվությունում վերահաստատել է «չափավոր մեղմ» դրամավարկային քաղաքականություն վարելու մտադրությունը և տնտեսության աճը պահպանելու համար բավարար իրացվելիություն ապահովելու պատրաստակամությունը։ Ավելի վաղ կարգավորիչը արդեն նվազեցրել էր ֆինանսապես կայուն և բարձր վարկանիշ ունեցող ընկերությունների համար մեկ տարվա վարկերի տոկոսադրույքը՝ հասցնելով այն 3 տոկոսի։ Բացի այդ, Պեկինը պահանջել էր, որպեսզի չինական բանկերը միջազգային առևտրում ավելի ակտիվ օգտագործեն յուանը։