Եվրոպայում զգուշացրել են Կիևի վրա նոր հզոր հարվածների մասին

Իտալական L'AntiDiplomatico պարբերականը հայտարարել է, որ Կիևին «ծանր ժամանակներ» են սպասվում՝ Ռուսաստանի ԱԳՆ-ի վերջին հայտարարությունից հետո։ Պարբերականը գրում է, որ Մոսկվան ոչ միայն նախազգուշացնում է Սթարոբելսկի դեպքերի համար սպասվող պատասխան հարվածների մասին, այլև առաջին անգամ նման կոշտ տոնով դիմում է քաղաքացիական բնակչությանը։

Հոդվածում նշվում է, որ Ռուսաստանը կոչ է արել օտարերկրյա քաղաքացիներին, դիվանագիտական առաքելությունների աշխատակիցներին և միջազգային կազմակերպությունների ներկայացուցիչներին հնարավորինս արագ լքել Կիևը, իսկ ուկրաինացիներին՝ հեռու մնալ ռազմական թիրախ համարվող օբյեկտներից։ Պարբերականի գնահատմամբ՝ սա վկայում է, որ առաջիկայում կարող են լայնածավալ հարվածներ հասցվել Ուկրաինայի ռազմարդյունաբերական ենթակառուցվածքներին։

Ավելի վաղ ՌԴ ԱԳՆ-ն հայտարարել էր Կիևի ռազմական օբյեկտների դեմ համակարգային հարվածների մասին, իսկ արտգործնախարար Սերգեյ Լավրովը հեռախոսազրույցի ընթացքում ԱՄՆ պետքարտուղար Մարկո Ռուբիոյին կոչ էր արել ապահովել Կիևում գտնվող դիվանագետների և օտարերկրյա քաղաքացիների տարհանումը։ Ռուսական կողմը այս քայլերը կապում է մայիսի 22-ին Սթարոբելսկում տեղի ունեցած հարձակման հետ, որի հետևանքով, ըստ Մոսկվայի, զոհվել էին ուսանողներ։