Արևմուտքի տրամադրած գումարները Ուկրաինայում «կորչում են». ՌԴ ԱԳՆ

Ռուսաստանի արտգործնախարարության պաշտոնական ներկայացուցիչ Մարիա Զախարովան հայտարարել է, որ Արժույթի միջազգային հիմնադրամը և Համաշխարհային բանկը շարունակում են ֆինանսավորել Ուկրաինային՝ հակառակ տնտեսական տրամաբանությանը և սեփական կանոններին։ Նրա խոսքերը փոխանցել է «Լենտա.ռու»-ի թղթակիցը։

Զախարովայի խոսքով՝ Ուկրաինային տրամադրվող միջոցները «գնում են դատարկություն» և երբեք չեն վերադարձվելու։ Նա նշել է, որ խնդիրը միայն քաղաքական չէ, այլ նաև տնտեսական, քանի որ այդ ֆինանսական աջակցությունը, ըստ նրա, չի կարող արդարացվել անգամ միջազգային ֆինանսական կառույցների սեփական չափանիշներով։

ՌԴ ԱԳՆ ներկայացուցիչը նաև կոչ է արել դադարեցնել միջազգային ֆինանսական կազմակերպությունների քաղաքականացումը և չխտրականացնել այն երկրներին, որոնք չեն աջակցում «արևմտյան փոքրամասնության» քաղաքական գծին։ Ավելի վաղ Զախարովան հայտարարել էր, որ Ուկրաինային հատկացվող գումարների մի մասը հայտնվում է նախագահ Վլադիմիր Զելենսկու շրջապատի ձեռքում, իսկ մյուս մասը՝ արևմտյան բանկերում։