Լորդերի պալատի զգուշացումը. Անգլիան պետք է կուտակի մթնոլորտային տեղումները և վերանայի ջրօգտագործման քաղաքականությունը

Ըստ խորհրդարանական հանձնաժողովի զեկույցի մինչև 2055 թվականը Անգլիայում ջրի օրական դեֆիցիտը կարող է հասնել հինգ միլիարդ լիտրի: Այս խնդիրը կանխելու համար կենսական նշանակություն ունեն անձրևաջրերի կուտակումը, կենցաղային ջրերի վերամշակումը, ինչպես նաև ջրի խնայողությանն ուղղված հրատապ միջոցառումների իրականացումը:

 

Միացյալ Թագավորության Լորդերի պալատի Շրջակա միջավայրի և կլիմայի փոփոխության հարցերով հանձնաժողովի հրապարակած զեկույցում ընդգծվում է, որ կլիմայի գլոբալ փոփոխություններով պայմանավորված անոմալ եղանակային դրսևորումները, բնակչության և արդյունաբերության աճը գերծանրաբեռնել են ջրամատակարարման համակարգերը: Առանց պետական միջամտության, երկիրը կկանգնի խմելու ջրի խորը ճգնաժամի առջև:

 

Հանձնաժողովի նախագահը նշել է, որ վերջին տարիների աննախադեպ երաշտները լուրջ սպառնալիք են ջրային ռեսուրսների կառավարման համակարգի համար։ Ձմեռային տեղումների կուտակումն ու պահեստավորումը դառնում են ռազմավարական առաջնահերթություն։ Հանձնաժողովն ներկայացրել է ռազմավարական առաջնահերթություններ՝ շինարարական նորմերի բարեփոխում, էկոհամակարգային լուծումների ինտեգրում, հանրային իրազեկվածության բարձրացում և այլն։

 

Անգլիայում մասնավոր ջրամատակարարող ընկերությունների կողմից վերջին երեք տասնամյակում որևէ նոր ջրամբար չի կառուցվել։ Թեև ներկայումս նախագծվում է ինը նոր ջրամբար, դրանց շահագործման հանձնումը կպահանջի տարիներ։ Մեկ այլ խորքային խնդիր է խողովակաշարերի մաշվածությունը, որի հետևանքով առաջացած ջրի կորուստը կազմում է ընդհանուր ջրապահանջարկի շուրջ 19%-ը։

 

Խորհրդարանականներն իրենց կոչն ավարտել են հրատապության հորդորով. «Ջուրը կյանքի գոյության հիմքն է. պետք է գործել անհապաղ՝ ապագա սերունդների համար երկրի ամենակարևոր ռեսուրսն ապահովելու համար»։