Հետխորհրդային երկիրը վերսկսել է ոսկու արտահանումը

Ուզբեկստանը կես տարվա դադարից հետո կրկին սկսել է ոսկու արտահանումը։ Այս մասին հայտնում է Bloomberg-ը՝ հղում անելով երկրի Ազգային վիճակագրական կոմիտեին։

Տվյալների համաձայն՝ տարվա առաջին չորս ամիսների ընթացքում Ուզբեկստանը արտահանել է մոտ 1,5 միլիարդ դոլարի ոչ դրամական ոսկի, որի հիմնական մասը վաճառվել է ապրիլին։ Bloomberg-ը նշում է, որ տարեկան շուրջ 130 տոննա ոսկի արդյունահանող երկիրը սեպտեմբերից հետո գրեթե ամբողջությամբ դադարեցրել էր արտահանումը, քանի որ երկրի կենտրոնական բանկը դարձել էր աշխարհում ոսկու խոշոր գնորդներից մեկը։

Պարբերականի գնահատմամբ՝ ոսկին շարունակում է մնալ Ուզբեկստանի տնտեսության հիմնական պաշտպանիչ ռեսուրսներից մեկը և կարևոր դեր ունի արտահանման ու բյուջետային եկամուտների ձևավորման հարցում։ Ավելի վաղ CNBC-ն հայտնել էր, որ մի շարք երկրների կենտրոնական բանկեր սկսել են կրճատել իրենց ոսկու պաշարները՝ Մերձավոր Արևելքի ճգնաժամի պատճառով առաջացած ֆինանսական խնդիրների և իրացվելիության պակասի ֆոնին։