Եվրոպայում պատրաստվում են բարձրացնել գնաճի կանխատեսումը

Եվրոպական կենտրոնական բանկը, ամենայն հավանականությամբ, կբարձրացնի եվրագոտում գնաճի աճի կանխատեսումը՝ Իրանի շուրջ ձգձգվող պատերազմի պատճառով։ Այս մասին հայտարարել է ԵԿԲ գլխավոր տնտեսագետ Ֆիլիպ Լեյնը։

Նրա խոսքով՝ ներկայիս կանխատեսմամբ եվրագոտում տարվա վերջում գնաճը պետք է կազմի 2,6 տոկոս, սակայն իրավիճակը Մերձավոր Արևելքում կարող է ստիպել վերանայել այդ ցուցանիշը դեպի վեր։ Bloomberg-ի կողմից հարցված տնտեսագետները կանխատեսում են, որ մինչև դեկտեմբերի վերջ գնաճը կարող է հասնել 2,9 տոկոսի։

Լեյնը հիմնական պատճառ է անվանել ԱՄՆ-ի և Իրանի միջև Հորմուզի նեղուցի շուրջ լարվածությունը, որը հանգեցրել է էներգակիրների թանկացման։ Նավթի, գազի և հեղուկացված բնական գազի գների աճը արդեն ազդում է եվրոպական շուկայի վրա։ Որոշ եվրոպական երկրներում գնաճը ապրիլին գերազանցել է 10 տոկոսը․ ամենաբարձր ցուցանիշը գրանցվել է Ռումինիայում՝ 10,7 տոկոս։ Տարածաշրջանում գնաճի արագացումը նաև դանդաղեցրել է տնտեսության աճը՝ հասցնելով այն ընդամենը 0,1 տոկոսի։