Նավթի համաշխարհային գները կտրուկ նվազել են

Համաշխարհային շուկայում նավթի գները կտրուկ անկում են գրանցել այն բանից հետո, երբ ավելացել է Հորմուզի նեղուցով անցնող տանկերների քանակը։ Brent տեսակի նավթի հուլիսյան ֆյուչերսները նվազել են 4,58 տոկոսով՝ հասնելով մեկ բարելի դիմաց 95 դոլարի, իսկ WTI տեսակի նավթը էժանացել է 5,4 տոկոսով՝ մինչև 88,8 դոլար։

Reuters-ի հարցված վերլուծաբանների կարծիքով՝ շուկան սկսել է ավելի վստահ լինել, որ Հորմուզի նեղուցի շուրջ իրավիճակի կարգավորման ուղղությամբ առաջընթաց կա։ Թրեյդերներն ավելի շատ ուշադրություն են դարձնում նավթային փոխադրումների վերականգնմանը, քան տարածաշրջանում շարունակվող ռազմական գործողություններին։

Միաժամանակ ԱՄՆ-ը օրեր առաջ հարվածներ էր հասցրել Հորմուզի նեղուցի մերձակայքում գտնվող թիրախներին, իսկ Իսրայելը ուժեղացրել էր Լիբանանի ռմբակոծությունները։ Ավելի վաղ իրանական զինվորական ներկայացուցիչ Էբրահիմ Զոլֆաղարին սպառնացել էր, որ նավթի գինը կարող է հասնել 200 դոլարի մեկ բարելի դիմաց, եթե Վաշինգտոնը շարունակի ռազմական գործողությունները Մերձավոր Արևելքում։