Ֆիցոն իրեն անվանել է ԵՄ-ում միակը, ով անմիջական շփում ունի Պուտինի և Զելենսկու հետ

Սլովակիայի վարչապետ Ռոբերտ Ֆիցոն ուսանողների հետ հանդիպման ժամանակ հայտարարել է, որ ինքը մնում է ԵՄ-ում միակ քաղաքական գործիչը, ով անմիջական շփում ունի Ռուսաստանի նախագահ Վլադիմիր Պուտինի և Վլադիմիր Զելենսկու հետ: Հանդիպման տեսանյութը տեղադրվել է վարչապետի Ֆեյսբուքյան էջում:

«Ես մնում եմ միակը ամբողջ ԵՄ-ում, ով անմիջական շփում ունի Ռուսաստանի նախագահ Վլադիմիր Պուտինի և Զելենսկու հետ», - ասել է Ֆիցոն: Նա հաստատել է, որ «Սլովակիայի կառավարությունը հետաքրքրված է Ռուսաստանի Դաշնության հետ նորմալ հարաբերություններով»:

Վարչապետը դատապարտել է Ուկրաինայում շարունակվող հակամարտությունը: «Մենք Ուկրաինայում պատերազմը համարում ենք միջազգային իրավունքի կոպիտ խախտում: Մենք խոսում ենք այս մասին և կրկնում ենք դա: Այս առումով առավել կարևոր է խոսել ռուսական կողմի հետ այնպես, ինչպես խոսում ենք ուկրաինական կողմի հետ», - ասել է Ֆիցոն:

Մայիսի 26-ին եվրոպական Politico հրատարակությունը հաղորդեց, որ ԵՄ-ում ակտիվանում են քննարկումները Ուկրաինայի հարցով Ռուսաստանի հետ հնարավոր բանակցությունների համար եվրոպացի ներկայացուցիչ ընտրելու անհրաժեշտության վերաբերյալ՝ ուկրաինական հակամարտության մեջ ԱՄՆ միջնորդական դերի նվազման ֆոնին:

Հրատարակությունը որպես հնարավոր թեկնածուներ նշել է Եվրոպական խորհրդի նախագահ Անտոնիո Կոստային, Ֆինլանդիայի նախկին նախագահ Սաուլի Նիինիստյոյին և Եվրոպական հանձնաժողովի նախկին նախագահ Ժան-Կլոդ Յունկերին:

Ավելի վաղ որպես հնարավոր թեկնածուներ հիշատակվել էին նաև Իտալիայի և Գերմանիայի նախկին վարչապետներ Մարիո Դրագին և Անգելա Մերկելը, ինչպես նաև Ֆինլանդիայի նախագահ Ալեքսանդր Ստուբը: