Թուրքիան չի կողմնորոշվում՝ Եվրամիությո՞ւն, թե՞ Շանհայի համագործակցության կազմակերպություն

Եվրամիության մի շարք երկրներ վերահաստատել են իրենց ընդդիմադիր վերաբերմունքը Անկարայի ջանքերին՝ դաշինքին միանալու առնչությամբ, որին ի պատասխան Էրդողանը ուրբաթ օրը ելույթի ժամանակ նշել է, որ եթե մոտակա ժամանակներս չհաստատվի անդամագրությունը, ապա Թուրքիան կարող է փնտրել այլ դաշինք: Այս մասին նշում է Voice of America գործակալությունը:

«Շանհայի հնգյակը ավելի լավն է և հզոր ու մենք նրանց հետ ունենք ընդհանուր շահեր»,-նշել է Էրդողանը` վկայակոչելով Շանհայի համագործակցության կազմակերպությանը` անվտանգության և առևտրային կազմակերպություն, որի մեջ մտնում են Ռուսաստանը, Չինաստանը, Տաջիկստանը, Ղազախստանը, Ուզբեկստանը, Ղրղզստանը: Անցած տարի Շանհայի համագործակցության կազմակերպությունը վերանայեց իր հարաբերությունները Թուրքիայի հետ` այն անվանելով դաշնակից կողմ: 

Էրդողանի հայտարարությունը բարձր քննադատության արժանացավ Թուրքիայի գլխավոր ընդդիմադիր կուսակցության կողմից, որը նշում էր, որ Շանհայի անդամ պետությունները քիչ ներդրում ունեն մարդու իրավունքների և ժողովրդավարության կայացման մեջ: Սակայն, դրան զուգահեռ, երկրում անցկացված սոցհարցումները ցույց էին տալիս, որ միայն բնակչության մեկ երրորդն է կողմնակից Եվրամիությանն անդամագրվելուն: Հաշվի առնելով այն հանգամանքը, որ Շանհայը անվտանգության խորհուրդ է, շատ վերլուծաբաններ նշում են՝ Թուրքիայի անդամակցության պաշտոնականացումը կարող է վնասել ՆԱՏՕ-ում նրա դիրքերին: 

Այնուամենայնիվ, այս տարի ենթադրվում է, որ երկու կողմն էլ՝ թե Բրյուսելը և թե Անկարան, փորձում են վերաակտիվացնել հարաբերությունները: Այսպես՝ այս տարի ակնկալվում է, որ Թուրքիա կայցելեն Գերմանիայի կանցլեր Անգելա Մերկելը և Ֆրանսիայի նախագահ Ֆրանսուա Օլանդը: