ԱՄՆ պաշտպանության նախարարը ահազանգել է Չինաստանի ռազմական աճի մասին

ԱՄՆ պաշտպանության նախարար Փիթ Հեգսեթը Սինգապուրում անցկացվող Shangri-La Dialogueի ժամանակ հայտարարել է, որ Չինաստանի արագ ռազմական հզորացումը լուրջ մտահոգության պատճառ է և կոչ է արել Ասիայի երկրների դաշնակիցներին զգալիորեն մեծացնել պաշտպանական ծախսերը։

Հեգսեթի խոսքով՝ ԱՄՆ-ն ակնկալում է, որ տարածաշրջանի գործընկերները պաշտպանության վրա կծախսեն ՀՆԱ-ի առնվազն 3,5 տոկոսը։ Նա ընդգծել է, որ Վաշինգտոնն այլևս չի պատրաստվում միայնակ կրել հարուստ երկրների անվտանգության հիմնական բեռը։ «Մեզ գործընկերներ են պետք, ոչ թե պաշտպանյալներ»,- հայտարարել է նա։

ԱՄՆ պաշտոնյան նաև անդրադարձել է Չինաստանի հետ հարաբերություններին՝ նշելով, որ վերջին տարիների համեմատ երկխոսությունը բարելավվել է, իսկ երկու երկրների զինվորականների միջև շփումները դարձել են ավելի հաճախակի։ Միաժամանակ նա վերահաստատել է, որ ԱՄՆ-ը պատրաստ է անհրաժեշտության դեպքում վերսկսել ռազմական գործողությունները Իրանի դեմ, եթե բանակցությունները ձախողվեն, ինչպես նաև ընդգծել է, որ Թայվանին սպառազինության հնարավոր վաճառքի վերջնական որոշումը կկայացնի Դոնալդ Թրամփը։