ՄԱԿ-ը կանգնել է ֆինանսական ճգնաժամի վտանգի առաջ․ ԱՄՆ-ն և Չինաստանը դադարեցրել են վճարումները

ՄԱԿ-ը կարող է բախվել լուրջ ֆինանսական խնդիրների, քանի որ կազմակերպության երկու խոշորագույն ֆինանսավորողներից՝ ԱՄՆ-ից և Չինաստանից, վճարումները զգալիորեն կրճատվել կամ հետաձգվել են։ The Wall Street Journal-ի տվյալներով՝ եթե իրավիճակը չփոխվի, կազմակերպության ազատ դրամական միջոցները կարող են սպառվել արդեն 2026 թվականի օգոստոսի կեսերին։

Հրապարակման համաձայն՝ ԱՄՆ-ն և Չինաստանը միասին ապահովում են ՄԱԿ-ի հիմնական բյուջեի շուրջ 42 տոկոսը։ Միայն ԱՄՆ-ի պարտքը ՄԱԿ-ին և խաղաղապահ առաքելություններին արդեն գերազանցել է 4 միլիարդ դոլարը։ Վաշինգտոնը հայտարարել է, որ ցանկանում է նվազեցնել, իր կարծիքով, անարդյունավետ ծախսերը և պահանջում է կազմակերպությունից ավելի շոշափելի արդյունքներ։ Այդ շրջանակում ԱՄՆ-ն նաև դուրս է եկել մի շարք միջազգային ծրագրերից, այդ թվում՝ Առողջապահության համաշխարհային կազմակերպությունից։

Միևնույն ժամանակ, WSJ-ի աղբյուրների գնահատմամբ, Չինաստանը ևս ձգձգում է իր վճարումները՝ փորձելով ուժեղացնել ազդեցությունը ՄԱԿ-ի ներսում։ Բյուջետային ճգնաժամի հետևանքով կազմակերպությունն արդեն սկսել է կրճատել ծախսերը․ փակվել են որոշ գրասենյակներ, վերացվել են շուրջ 3000 աշխատատեղեր, իսկ Նյու Յորքի կենտրոնակայանում նույնիսկ սահմանափակվել է թարգմանչական ծառայությունների աշխատանքը։ ՄԱԿ-ի գլխավոր քարտուղար Անտոնիու Գուտերեշը դեռ տարեսկզբին զգուշացրել էր, որ եթե անդամ երկրները ժամանակին չկատարեն իրենց ֆինանսական պարտավորությունները, կազմակերպությունը կարող է հայտնվել ֆինանսական կոլապսի եզրին։