Սարսափելի դեպք․ ծառի տակ հայտնաբերվել են խոշտանգված կենդանի առնետներ

Ռուսաստանի Պուշկին քաղաքում անհայտ անձը դաժան վերաբերմունքի է ենթարկել մի քանի փոքր առնետների։ Կենդանիներին հայտնաբերել է զբոսանքի դուրս եկած մի դեռահաս՝ քաղաքի այգիներից մեկում։ Ծառի մոտ դրված տուփի մեջ գտնվել են հինգ առնետներ, որոնք ծանր վնասվածքներ էին ստացել, սակայն հայտնաբերման պահին դեռ կենդանի էին։

Դեպքի վայր ժամանած կամավորների փոխանցմամբ՝ կենդանիները գտնվում էին ծայրահեղ ծանր վիճակում։ Նրանցից մեկը սատկել է մինչև օգնության հասնելը, իսկ մնացածների կյանքի համար այժմ պայքարում են անասնաբույժները։ Կենդանիների նկատմամբ ցուցաբերված դաժան վերաբերմունքը մեծ վրդովմունք է առաջացրել տեղի բնակիչների և կենդանապաշտպանների շրջանում։

Ակտիվիստները պատրաստվում են դիմել իրավապահ մարմիններին՝ պահանջելով հայտնաբերել և պատասխանատվության ենթարկել կենդանիներին վնասած անձին։ Դեպքը լայն արձագանք է ստացել սոցիալական ցանցերում, որտեղ օգտատերերը պահանջում են խիստ պատիժ կիրառել մեղավորի նկատմամբ։