Ռուսաստանը սահմանափակել է Հայաստանից ձկան ներմուծումը․ թույլտվություն ստացել են միայն երկու ընկերություն

Ռուսաստանի անասնաբուժական և բուսասանիտարական վերահսկողության դաշնային ծառայությունը՝ Россельхознадзор-ը, հայտարարել է, որ հունիսի 2-ից Հայաստանը պետք է դադարեցնի կենդանի ձկան և ձկնամթերքի արտահանման անասնաբուժական սերտիֆիկացումը դեպի Ռուսաստան՝ բացառությամբ երկու ընկերությունների։

Ռուսական կողմը մայիսի 21–27-ը ստուգումներ է իրականացրել Հայաստանի ձկնաբուծական և ձկնավերամշակման ոլորտում՝ այցելելով նաև իշխանական տնտեսություններ և հատկապես իշխանի արտադրությամբ զբաղվող տնտեսություններ։ Ըստ հայտարարության՝ ստուգման ենթակա ընկերությունների մի մասը չի մասնակցել կամ չի անցել գործընթացը։

Արդյունքում Ռուսաստանը թույլատրել է ներմուծումը միայն երկու հայկական ընկերություններից, և նույնիսկ այդ դեպքում՝ անվտանգության ցուցանիշների պարտադիր լաբորատոր վերահսկողության պայմանով։ Ռուսական կողմը նշել է, որ սահմանափակումները կմնան ուժի մեջ մինչև իրավիճակի կարգավորումը։

Սա տեղի է ունենում այն ֆոնին, երբ ավելի վաղ ռուսական կողմը ժամանակավոր սահմանափակումներ էր կիրառել նաև Հայաստանից որոշ գյուղատնտեսական ապրանքների՝ այդ թվում լոլիկի, վարունգի, պղպեղի, կանաչեղենի և ելակի ներմուծման նկատմամբ։