Մեքենաների ներմուծմամբ զբաղվող ընկերությունը անհետացել է հաճախորդների գումարներով

Ռուսաստանում ավելի քան 250 մարդ հայտարարել է, որ տուժել է ավտոմեքենաների ներմուծմամբ զբաղվող Din-X Auto ընկերության գործունեությունից։ Ըստ հրապարակումների՝ քաղաքացիները ընկերությանը փոխանցել էին գումարներ՝ Հարավային Կորեայից մեքենաների ձեռքբերման և առաքման նպատակով, սակայն հետագայում կապը կազմակերպության հետ ընդհատվել է։

Տուժածների խոսքով՝ ընկերության ներկայացուցիչները հաճախորդներին հորդորել են արագ կատարել կանխավճարները՝ պատճառաբանելով, թե մոտ ապագայում կբարձրանա ուտիլիզացիոն վճարը։ Գործարքների շրջանակում մարդիկ փոխանցել են 2-ից մինչև 9 միլիոն ռուբլի, իսկ պայմանագրերի ձևակերպումը հիմնականում իրականացվել է հեռավար եղանակով։ Ավելի ուշ հաճախորդներին հայտնել են, թե մեքենաները հասել են Ռուսաստան, սակայն VIN համարներով ստուգումների արդյունքում պարզվել է, որ մի շարք մեքենաներ շարունակում են գտնվել Հարավային Կորեայում։

Տուժածների պնդմամբ՝ սխեման կարող էր գործել դեռևս 2025 թվականի գարնանից։ Նրանց խոսքով՝ վստահություն ձևավորելու նպատակով հրապարակվել են տեսանյութեր, որտեղ ցուցադրվել են մեքենաների հանձնման բեմականացված տեսարաններ, ինչպես նաև տարածվել են դրական արձագանքներ։ Ներկայում ընկերության կայքերը չեն գործում, հաշիվների վրա սահմանափակումներ են կիրառվել, իսկ տուժածների նախնական գնահատմամբ ընդհանուր վնասը կարող է գերազանցել մեկ միլիարդ ռուբլին։ Շատերն արդեն դիմել են իրավապահ մարմիններին։