Մակրոնը Թրամփի հետ զրույցում պատրաստակամություն է հայտնել աջակցելու ԱՄՆ-Իրան բանակցություններին

Ֆրանսիայի նախագահ Էմանուել Մակրոնը հայտարարել է, որ ԱՄՆ նախագահ Դոնալդ Թրամփի հետ հեռախոսազրույցի ընթացքում բարձր է գնահատել Միացյալ Նահանգների ջանքերն Իրանի հետ արագ համաձայնության հասնելու հարցում։

«Երեկ երեկոյան նախագահ Թրամփի հետ խոսեցի Մերձավոր Արևելքում ստեղծված իրավիճակի մասին։

Ես բարձր գնահատեցի նրա կողմից ձեռնարկվող վճռական ջանքերը՝ Միացյալ Նահանգների և Իրանի միջև արագ համաձայնության հասնելու համար, որը եզակի հնարավորություն է՝ կառուցելու նոր անվտանգության համակարգ՝ ներառելով բոլոր շահագրգիռ կողմերին և հնարավոր դարձնելու տարածաշրջանի երկարատև կայունացումը»,-նշել է նա X-ի գրառման մեջ։

Մակրոնը հայտնել է, որ Ֆրանսիան պատրաստ է աջակցելու այդ ջանքերին և լիարժեք դերակատարություն ունենալ դրանց կյանքի կոչման գործում։

«Սա է միջազգային առաքելության նպատակը, որը մենք ստեղծել ենք բրիտանացիների և մեր գործընկերների հետ։ Առաքելությունը պատրաստ է տեղակայվել համաձայնագրի կնքումից անմիջապես հետո՝ Հորմուզի նեղուցում ծովային երթևեկության անվտանգությանը նպաստելու համար»,- հավելել է Մակրոնը՝ նկատի ունենալով Հորմուզի նեղուցը վերաբացնելու համար նախատեսված բազմազգ, պաշտպանական ռազմածովային առաքելությունը։

«Մենք նաև պատրաստ ենք մեր փորձը և կարողությունները ներդնել սկսվող ավելի լայն բանակցություններում, մասնավորապես՝ համաձայնագրի միջուկային ասպեկտի ուղղությամբ», - նշել է նա։