Չինաստանի քաղաքացիները փորձել են Ռուսաստանից ապօրինի դուրս բերել ոսկի՝ շուրջ 9,8 մլն ռուբլու արժեքով

Ռուսաստանի Անդրբայկալյան երկրամասում դատարանը դատապարտել է Չինաստանի երկու քաղաքացու՝ երկրից ոսկու ապօրինի արտահանման փորձի համար։ Ըստ պաշտոնական տվյալների՝ խոսքը վերաբերում է շուրջ 9,8 միլիոն ռուբլու արժեքով թանկարժեք մետաղին։

Քննության վարկածով՝ մեղադրյալներից մեկը մյուսին փոխանցել է կապարից պատրաստված յոթ ձուլակտոր, որոնց ներսում թաքցված է եղել ոսկին։ Այնուհետև ձուլակտորները թաքցվել են մեքենայի խցիկում և փորձ է արվել դրանք տեղափոխել «Զաբայկալսկ» անցակետով դեպի Չինաստան։

Իրավապահների տվյալներով՝ նրանք հաշվարկել էին, որ կապարի տեղափոխումն արգելված չէ, և բեռը ուշադրություն չի գրավի, սակայն սահմանապահներն ու մաքսային ծառայությունները հայտնաբերել են թաքցված մետաղը։

Փորձաքննության արդյունքում պարզվել է, որ ձուլակտորների ներսում եղել է ավելի քան մեկ կիլոգրամ ոսկի։

Դատարանը մեկ մեղադրյալին դատապարտել է 6 տարվա, իսկ մյուսին՝ 5 տարի 9 ամիս ազատազրկման, ինչպես նաև յուրաքանչյուրի նկատմամբ նշանակել է 500 հազար ռուբլի տուգանք։