Նախատեսվում է ստեղծել MS-21 ինքնաթիռի նոր տարբերակ՝ որպես Airbus A320-ի մրցակից

Ռուսաստանում նախատեսվում է 2028 թվականից հետո ներկայացնել MS-21 մարդատար ինքնաթիռի կրճատված տարբերակը, որը նախատեսվում է դիրքավորել որպես Airbus A320-ի անմիջական մրցակից։ Այդ մասին հայտարարել է Ռուսաստանի առաջին փոխվարչապետ Դենիս Մանտուրովը։

Նրա խոսքով՝ նոր տարբերակը կունենա ավելի կարճ ֆյուզելյաժ՝ հիմնական մոդելի համեմատ երկու հատվածով պակաս, ինչը, ըստ պաշտոնյայի, ավելի համապատասխան կլինի ռուսական ավիաընկերությունների պահանջներին։

Մանտուրովը նշել է, որ սկզբում պատվիրատուներին կմատակարարվի MS-21-ի ամբողջական տարբերակը, իսկ դրանից հետո կսկսվեն կրճատված տարբերակի սերիական արտադրության նախապատրաստական աշխատանքները։ Նրա խոսքով՝ տեխնիկապես այն կհամարվի գրեթե նոր ինքնաթիռ, թեև հիմնական համակարգերը կմնան նույնը։

Ավելի վաղ «Ռոստեխ»-ի ղեկավար Սերգեյ Չեմեզովը հայտնել էր, որ MS-21-ի սերտիֆիկացման գործընթացն այժմ նախատեսվում է ավարտել 2027 թվականի սկզբին, իսկ նույն տարում նախատեսվում է սկսել նաև դրա սերիական արտադրությունը։