«Հայաստանը պետք է լրջորեն մտածի»․ «Լենտա.ռու»-ն անդրադարձել է Հայաստանի՝ ԵԱՏՄ-ի և ԵՄ-ի միջև ընտրության թեմային

Ռուսական «Լենտա.ռու» պարբերականը հրապարակել է վերլուծական նյութ, որտեղ անդրադարձ է կատարվում ԵԱՏՄ գագաթնաժողովում Հայաստանի վերաբերյալ հնչած առաջարկներին։ Ըստ հրապարակման՝ Ռուսաստանի, Բելառուսի, Ղազախստանի և Ղրղզստանի ներկայացուցիչները Երևանին առաջարկել են հնարավորինս արագ անցկացնել հանրաքվե և որոշել՝ երկիրը շարունակելո՞ւ է անդամակցությունը Եվրասիական տնտեսական միությանը, թե՞ ընտրելու է Եվրամիության ուղղությունը։

Նյութում նշվում է, որ Ռուսաստանի նախագահ Վլադիմիր Պուտինը ևս կողմ է արտահայտվել հանրաքվեի գաղափարին, իսկ Բելառուսի նախագահ Ալեքսանդր Լուկաշենկոն հայտարարել է, որ հայ ժողովուրդը պետք է լրջորեն մտածի նման ընտրության շուրջ։ «Լենտա.ռու»-ն նաև ընդգծում է, որ ԵԱՏՄ շրջանակում մտահոգություններ կան Հայաստանի եվրոպական ինտեգրման ակտիվացման ֆոնին։

Միևնույն ժամանակ պարբերականը ներկայացնում է նաև Հայաստանի վարչապետ Նիկոլ Փաշինյանի դիրքորոշումը․ նրա խոսքով՝ հանրաքվեի հարցն այս պահին օրակարգում չկա, քանի որ Հայաստանը դեռ պաշտոնապես չի դիմել Եվրամիության անդամակցության համար, սակայն նման որոշման դեպքում վերջնական խոսքը պետք է պատկանի Հայաստանի քաղաքացիներին։