Հնդկաստանը գնահատել է ԱՄՆ ճնշման պայմաններում ռուսական նավթի գնումների շարունակման հնարավորությունը

Հնդկական բիզնես ալյանսի (IBA) նախագահ Սեմմի Կոտվանին հայտարարել է, որ Ռուսաստանն ու Հնդկաստանը, ամենայն հավանականությամբ, կշարունակեն նավթի առևտուրը՝ անկախ ԱՄՆ հնարավոր նոր սահմանափակումներից։

Նրա խոսքով՝ նույնիսկ պատժամիջոցների խստացման դեպքում երկու երկրները կարող են պահպանել համագործակցությունը՝ կիրառելով ավելի զգույշ և ճկուն մոտեցումներ։ Կոտվանին նշել է, որ կողմերն արդեն փորձ ունեն բարդ առևտրային պայմաններում աշխատելու հարցում։

Նա որպես հնարավոր լուծումներ նշել է ազգային արժույթներով հաշվարկները, արտաքին ճնշումներից քիչ կախված բանկային ուղիները, երկարաժամկետ մատակարարման պայմանագրերը, ապահովագրական գործիքներն ու այլընտրանքային լոգիստիկ երթուղիները։

Կոտվանին նաև ընդգծել է, որ ռուս-հնդկական համագործակցությունը չի սահմանափակվում միայն էներգետիկ ոլորտով և ներառում է պաշտպանություն, դեղագործություն, գյուղատնտեսություն, տեխնոլոգիաներ, պարարտանյութերի արտադրություն, կրթություն և այլ ուղղություններ։