Ավտոփորձագետը նշել է ամենաթերագնահատված չինական մեքենաները․ որ մոդելներին արժե ուշադրություն դարձնել

Օգտագործված մեքենաների շուկայում կան չինական մի շարք մոդելներ, որոնք գնորդների կողմից դեռևս թերագնահատվում են, չնայած վերջին տարիներին զգալիորեն բարելավել են իրենց որակը, տեխնոլոգիաներն ու սպասարկման մակարդակը։ Այս մասին «Գազետա.ռու»-ին տված հարցազրույցում հայտարարել է «Ավիլոն» ընկերությունների խմբի օգտագործված ավտոմեքենաների ուղղության փոխտնօրեն Ռոման Տիտովը։

Փորձագետի խոսքով՝ երկրորդային շուկայում առավել թերագնահատվածներից են համարվում Haval Jolion-ը, Haval F7-ը, Geely Coolray-ը, Geely Atlas Pro-ն, Chery Tiggo 4 Pro-ն, Chery Tiggo 7 Pro-ն, ինչպես նաև Exeed TXL և RX մոդելները։ Նա նշել է, որ հատկապես շահավետ են այն տարբերակները, որոնք ձեռք են բերվել պաշտոնական դիլերից, ունեն սպասարկման հաստատված պատմություն և գործող կամ մնացորդային երաշխիք։

Միաժամանակ Տիտովը նշել է նաև գերագնահատված ավտոմեքենաների շարքը՝ ընդգծելով, որ որոշ դեպքերում բարձր արժեքը պայմանավորված է ոչ թե իրական տեխնիկական վիճակով, այլ բրենդի հեղինակությամբ։ Այդ ցանկում նա ընդգրկել է Toyota Land Cruiser-ը, Land Cruiser Prado-ն, Camry-ն, Lexus LX և RX մոդելները, ինչպես նաև Hyundai Solaris-ը, Kia Rio-ն և որոշ Mercedes-Benz, BMW ու Range Rover մեքենաներ՝ հատկապես այն դեպքերում, երբ բացակայում է սպասարկման հստակ պատմությունը։