Բեսենթ. ԱՄՆ-ն և Չինաստանը կարող են փոխադարձաբար վերացնել 30 միլիարդ դոլարի ապրանքների մաքսատուրքերը

ԱՄՆ-ի և Չինաստանի կառավարությունները քննարկում են յուրաքանչյուր կողմի համար 30 միլիարդ դոլարի ապրանքների վրա մաքսատուրքերի փոխադարձ վերացման հնարավորությունը։ Այս մասին հայտարարել է ԱՄՆ ֆինանսների նախարար Սքոթ Բեսենթը։

«Մենք ստեղծել ենք առևտրային խորհուրդ, և մենք կուսումնասիրենք այն ոլորտները և ապրանքները, որոնք ոչ կարևորների շարքում են, որոնցով կարող ենք առանց մաքսատուրքի առևտուր անել միմյանց հետ», – ասել է նա ԱՄՆ Սենատի ֆինանսական կոմիտեի լսումների ժամանակ։

Բեսենթը նշել է, որ նման միջոցառումները կարող են ազդել յուրաքանչյուր կողմի համար 30 միլիարդ դոլարի ապրանքների վրա։ «Դա 30 միլիարդ դոլարի ոչ էական ապրանքներ է՝ հրավառություն, Հելոուինի զգեստներ, ամենատարածված առօրյա իրեր, բաներ, որոնք մենք չենք ուզում ինքներս արտադրել, բայց գնել նրանցից», – բացատրել է նա։ «Եվ դրանք այն ապրանքներն են, որոնք նրանք ուզում են գնել մեզանից։ Հնարավոր է՝ ծովամթերք, էներգիա»։ «Եվ այդ դեպքում մենք կհամաձայնվենք, որ այս ապրանքների զամբյուղը չի ենթարկվի մաքսատուրքերի ոչ մի կողմից», – հավելել է նախարարը։

Չինաստանի առևտրի նախարարությունը մայիսին հայտարարել է, որ Չինաստանը և Միացյալ Նահանգները կքննարկեն յուրաքանչյուր կողմի համար առնվազն 30 միլիարդ դոլարի ապրանքների վրա փոխադարձ մաքսատուրքերի նվազեցման հարցը։