Արամ Խաչատրյանի անվան 22-րդ միջազգային մրցույթը կմեկնարկի կոմպոզիտորի ծննդյան օրը

Հունիսի 6-ը մեծանուն կոմպոզիտոր Արամ Խաչատրյանի ծննդյան օրն է։ Ձևավորված ավանդույթի համաձայն՝ այդ օրը կմեկնարկի Խաչատրյանի անվան միջազգային մրցույթը՝ թավջութակ մասնագիտությամբ։

Արամ Խաչատրյանի անվան միջազգային 22-րդ մրցույթն իրականացվում է ՀՀ կրթության, գիտության, մշակույթի և սպորտի նախարարության աջակցությամբ և «Արամ Խաչատրյան» մշակութային հիմնադրամի կազմակերպմամբ։

Հունիսի 6-ին՝ ժամը 10։00-ին, Արամ Խաչատրյանի տուն-թանգարանում տեղի կունենա մրցույթի մեկնարկի մամուլի ասուլիսը, ժամը 11։00-ին՝ վիճակահանությունը, իսկ ժամը 12։00-ին Կոմիտասի անվան պանթեոնում հարգանքի տուրք կմատուցվի կոմպոզիտորի հիշատակին։

Խաչատրյանի անվան միջազգային մրցույթը՝ թավջութակ մասնագիտական կարգում, կանցկացվի հունիսի 6-13-ը՝ համախմբելով աշխարհի տարբեր մայրցամաքները ու երկրները ներկայացնող երիտասարդ թավջութակահարների:

Մրցույթի ժյուրիի կազմում ընդգրկված են միջազգային երաժշտական աշխարհի հնչեղ անուններ Դենիս Սևերինը (Շվեյցարիա), Մարթի Ռոսին (Ֆինլանդիա), Միհե Ռիոն (Կորեայի Հանրապետություն), Ժոզեֆին Նայթը (Միացյալ Թագավորություն), Լևոն Մուրադյանը (Հայաստան/Պորտուգալիա), Գրեգորիո Նիետոն (Վենեսուելա) և Վիկտոր-Ժուլիեն Լաֆերիերը (Ֆրանսիա)․ անվանի մասնագետներն իրենց ներկայությամբ, վարպետությամբ և արժեքավոր խորհուրդ-դիտարկումներով կուղղորդեն մրցույթի երիտասարդ մասնակիցներին:

Հունիսի 6-ին՝ ժամը 19․00-ին, «Արամ Խաչատրյան» համերգասրահում կկայանա մրցույթի բացման պաշտոնական արարողությունը, իսկ հունիսի 13-ին՝ ժամը 19․00-ին՝ պարգևատրման արարողությունը և եզրափակիչ գալա համերգը:

Համերգային երեկոյի ընթացքում կհնչեն հատվածներ Արամ Խաչատրյանի հայտնի ստեղծագործություններից՝ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր, Խաչատրյանի անվան միջազգային մրցույթի գեղարվեստական ղեկավար Սերգեյ Սմբատյանի ղեկավարությամբ։ Համերգային ծրագրում ընդգրկված է նաև Խաչատրյանի հանրահայտ Թավջութակի կոնցերտը՝ աշխարհահռչակ թավջութակահար Վիկտոր-Ժուլիեն Լաֆերիերի մենակատարությամբ։

Խաչատրյանի անվան միջազգային մրցույթի նպատակն է բացահայտել երիտասարդ երաժիշտների, ինչպես նաև աշխարհում հանրահռչակել Արամ Խաչատրյանի երաժշտությունը։